Францын хамгийн баян тэрбумтан Бернар Арно Белги улсаас орогнол хүссэн өргөдөл гаргасан байна. LVMH компанийн тэргүүн 63 настай тэрээр Белгийн парламентад энэ долоо хоногт өргөдлөө өгөх юм байна. Түүний эзэмшдэг LVMH бол дэлхийд алдартай олон арван брэндийг эгнээндээ нэгтгэсэн асар баян компани юм. Тухайлбал, түүний компани Hennessy, Lous Vuitton, Fendi, Kenzo, Givenchy, Marc Jacobs, Bulgari, Tag Heuer, Hublot, Celine, Parfums Christian Dior, Guerlain  гэх мэт брэндийг эзэмшдэг юм.  
Ерөнхийлөгч Франсуа Олландын сонгуулийн өмнөх амлалтаар бол тэрбумтан Бенар Арно орлогынхоо 75 хувьтай тэнцэх татвар төлбөл жилд нэг сая гаруй еврогийн татвар төлөх болоод байгаа юм. Франсуа Олланд өндөр орлоготой иргэдэд оногдуулах татварыг нэмэгдүүлэхээр амласан нь ийм үр дүн дагуулж байна. Хэвлэлүүд өнгөрсөн долоо хоногт Ерөнхийлөгчийн энэ төлөвлөгөөг өөрчилж ялгавартай тогтоох боллоо  гэж байсан ч Сангийн сайд Пьер Москович энэ татварыг 2013 оны төсөвт суулгаж өгнө гэсэн юм. Брюсселльд өөрийн байшинтай ч Парист байнга амьдардаг Арног 41 тэрбумын хөрөнгөтэй гэж “Forbes” сэтгүүл тодорхойлсон юм. Тэрээр өмнөх Ерөнхийлөгч Николь Саркозийн хамтран зүтгэгч юм. Арно Францад социалист Ерөнхийлөгч гарсны дараа эх орноосоо зугтаж байгаа нь анхны удаа биш. Тэрээр 1981 онд Франсуа Миттераныг Ерөнхийлөгч болсны дараа гурван жил АНУ-д амьдраад түүнийг солигдсоны дараа эх орондоо эргэн ирж байжээ.
Францын баталгаажуулах комиссын тэргүүн Жорж Даллеманын мэдэгдсэнээр ийм байдлаар Белгийн харьяалал хүсч байгаа хүний тоо 47 мянга хүрээд байгаа юм байна.