Ерөнхийлөгч Б.Обамаг дахин сонгуулах зорилготой АНУ-ын Ардчилсан намын их хурал энэ өдрүүдэд Хойд Каролинад болж байна. Гурван өдөр үргэлжлэх их хуралд тэргүүн хатагтай Мишель Обама, экс Ерөнхийлөгч Билл Клинтон зэрэг хүмүүс Барак Обамаг дэмжин үг хэлэх юм. Харин хурлын сүүлчийн өдөр Ерөнхийлөгч Б.Обама өөрөө үг хэлэх бөгөөд тэр үед хурлын танхимд 74 мянган хүн цугларах төлөв гарчээ.

Харин энэ хооронд Бүгд найрамдах намын нэр дэвшигч Митт Ромни Б.Обаматай халз мэтгэлцэхдээ шаргуу бэлтгэж байгаа гэнэ. Саяхны судалгаагаар Барак Обамагийн рейтинг Митт Ромнигоос үл ялиг илүү яваа дүн гарсан юм. Гэвч өмнөх Ерөнхийлөгч нарын рейтингтэй харьцуулбал Б.Обама маш доогуур үзүүлэлттэй байгаа юм. Түүнээс өмнөх үеийн төрийн тэргүүнүүд дахин сонгуульд өрсөлдөх үедээ түүнээс илүү өндөр рейтингтэй байдаг байжээ.