Умард Солонгосын удирдагч Ким Чен Ун ирэх долоо хоногт Тегеранд болох Эвсэлд үл нэгдэх хөдөлгөөний дээд хэмжээний уулзалтад оролцохоор төлөвлөж байна. Дээд хэмжээний уулзалт зохион байгуулах хорооны төлөөлөгч Мохаммад Реза Форкины хэлснээр бол Ким Чен Ун 40-өөд орны тэргүүн цуглах уг уулзалтад оролцох хүсэлтээ ирүүлжээ. Энэ бол 2011 оны арванхоёрдугаар сард ажилдаа орсон умардын удирдагчийн гадаадад хийх анхны айлчлал болох юм. Гэхдээ умард Солонгосын тал энэ мэдээллийг батлаагүй байна.
Эвсэлд үл нэгдэх хөдөлгөөн нь Өрнө дорнын ямар нэгэн эвсэлд нэгдээгүй орнууд анх байгуулсан, өдгөө 120 орны гишүүнчлэлтэй, 20 гаруй ажиглагчтай болсон олон улсын байгууллага юм. Өмнөд Солонгос энэ хөдөлгөөний ажиглагч гишүүн юм.
Дээд хэмжээний уулзалт Ираны нийслэл Тегеранд энэ сарын 26-31-нд болно.