Либерийн Ерөнхийлөгч Элен Жонсон-Серлиф өөрийнхөө хүүг болон төрийн 45 албан тушаалтныг авлигатай тэмцэх байгууллагад хөрөнгө орлогын мэдүүлгээ өгөөгүйнх нь төлөө албан тушаалаас нь огцруулжээ. Ерөнхийлөгчийн хүү Чарльз Серлиф улсынхаа төв банкны орлогч захирлын алба хашдаг байжээ. Либерийн Ерөнхийлөгчийн Тамгын газрын мэдээнд “Ерөнхийлөгч Элен Жонсон-Серлиф төрийн 46 албан хаагчийг албан тушаалаас нь огцрууллаа” гэжээ.
Жонсон-Серлиф 2005 онд Африкийн анхны эмэгтэй төрийн тэргүүн болж өнгөрсөн онд хоёр дахь удаагаа сонгогдсон юм. Либерт 14 жил үргэлжилсэн иргэний дайныг зогсоож энх амгалан тогтоосныхоо төлөө тэрээр 2011 онд Нобелийн шагнал хүртсэн билээ.