Филиппиний нийслэл Манила хот  үерт автаж, олон арван мянган хүн орон гэрээ орхин дүрвэж байна. Үерийн улмаас сургууль цэцэрлэг хаалгаа барьж, албан байгууллагууд, тэр дундаа хөрөнгийн биржийн үйл ажиллагаа ч тасалдахад хүрчээ. Одоогоор гамшгийн хор хохирлын талаар тодорхой тоо мэдээ гараагүй ч үерийн улмаас хөрс нурахад олон тооны хүн дарагдсан гэж мэдээлж байна. Ердөө долоо хоногийн өмнө Саола хэмээх салхины улмаас тус улсад 50 гаруй хүн амь үрэгдсэн.  Угаас хар салхинд нэрвэгдчихээд байсан газар нутгийг өнгөрсөн даваа гаригаас хойш тасралтгүй орсон аадар бороо бүр ч туйлдуулж, гамшгийн аюул зарлахад хүргээд байна. 2009 онд Манила хот мөн л Кецана хэмээх хар салхинд нэрвэгдсэн дараа үерт автаж, 400 хүн амь үрэгдэж байсан.