Саудын Аравийн угсаа залгамжлах хунтайж Найф бин Абдул Азиз Аль Сауд таалал төгсчээ. Тэрээр амьсгал хураах үедээ эх орондоо байгаагүй гэнэ. 77 настай хунтайж өнгөрсөн сард амралтаа авч, биеэ эмчлүүлэхээр Швейцарийн Женевт ирээд байжээ. Гэхдээ чухам ямар өвчний улмаас нас барсан талаарх мэдээлэл алга байна. Хунтайж Найф бол Абдул Азиз хааны угсаа залгамжлах хөвгүүдийн нэг байсан юм. Түүний ах 88 настай Абдулла одоо хаан ширээнд сууж буй бөгөөд Дотоод хэргийн сайдаар 1975 оноос хойш ажиллаж буй дүү Найфыгаа угсаа залгамжлах хунтайжаар өнгөрсөн онд өргөмжилсөн юм. Гэвч хаан ширээ залгамжлах хунтайж таалал төгссөн тул дахин шинээр зарлах ёстой болно. Хэвлэлүүдийн бичиж буйгаар хаан Абдуллагийн дүү, Батлан хамгаалахын сайд хунтайж Салман угсаа залгамжлагчаар тодорч магадгүй байна.  
1932-1953 онд хаан ширээнд сууж байсан Абдул Азиз хаан 20 гаруй хүүтэй. Тэр дундаас хааны хамгийн хайртай хатан Хасса бинт Ахмед Аль Судайригаас төрсөн долоон хүү улсынхаа хаан ширээг ээлжлэн залгамжилж байгаа юм. “Судайригийн долоо” гэгддэг Абдул Азиз хааны хөвгүүд улсынхаа хамгийн өндөр сэнтийд залардаг.