Эрүүл мэнд, спортын сайд Г.Шийлэгдамбыг АТГ баривчилсан тухай асуудлаар МАХН-аас  хэвлэлийн бага хурал зарлаж мэдээлэл хийлээ. МАХН-ын нарийн бичгийн дарга Э.Эрдэнэжамъян “МАХН-ын нэр хүнд сэргэж, үйл ажиллагаа нь идэвхжиж байгаатай холбоотойгоор бидний үйл ажиллагааг сааруулах, айлгах зорилготой явуулж байгаа арга хэмжээнийх нь нэг. МАХН иймэрхүү хэлмэгдүүлэлтийг үзсээр ирсэн. Ийм хэлмэгдүүлэлтээс бид айхгүй” гэв.
МАХН-ын нарийн бичгийн дарга Ц.Шаравдорж “Монгол оронд мөрдөх, хэлмэгдүүлэх, тагнах чагнах ажиллагаа ердийн үзэгдэл болсон байна. 1937 оны аймшигт хэлмэгдүүлэлтийг бид түгшүүртэйгээр ярьдаг. Гэтэл өнөөдөр шүүх, цагдаа, прокурор, АТГ Монгол Улсын иргэдийг хэлмэгдүүлдэг, бодлогын арга хэрэгсэл болж хувирсан нь аймшигтай. Бас гутамшигтай. Өнөөдөр монголчууд айдас дунд амьдарч байна” гэсэн байна.