Их Британийн Ерөнхий сайд Дэвид Камеруныхан зоогийн газарт хүүхдээ мартаад явчихсан хачирхалтай тохиолдол саяхан гарчээ. Ерөнхий сайдынх найзуудынхаа гэр бүл, хүүхдүүдтэй хамт Лондоны баруун хэсэгт орших “The Plough” хэмээх пабад оройн хоол идсэн аж. Ингэж явахдаа найман настай охин Нэнсигээ ариун цэврийн өрөө орохоор явсан хойгуур мартаад гэртээ харьчихсан гэнэ. Хоолны дараа зочид гурван машинд хуваагдан суусан учир Нэнсиг нөгөө машиндаа суусан байх гэж боджээ. Ерөнхий сайд албаныхаа машинтай гэр бүлээсээ тусдаа явах ёстой учир охиноо эхнэртэйгээ хамт яваа гэж бодож. Харин Саманта Камерун охиноо аавтайгаа байгаа гэж ойлгоод гэртээ иртэл хэнтэй нь ч хамт яваагүйг мэдээд паб руу сандран утасдахад охин нь тэндэхийн ажилтнуудад туслаад гүйж явжээ. Дэвид Камеруны гэр бүл тус пабаар байнга үйлчлүүлж, ням гариг бүрт ирж хооллодог учраас ажилтнууд нь Ерөнхий сайдынхаа охиныг төвөггүй таньжээ. Энэ инээдтэй гэмээр явдлыг сонссон англичууд Ерөнхий сайдынхаа мартамхайг гайхаж байгаа гэнэ.
Ерөнхий сайдын гэр бүл гурван хүүхэдтэй бөгөөд Нэнси том нь юм. Түүний удаахь нь зургаан настай Артур хэмээх хүү байдаг бол хамгийн бага нь хоёр ойтой Флоренц охин юм.