Монгол Улсын хэмжээнд захиргааны чиглэлийн үйл ажиллагааг зохицуулсан 250 гаруй хууль хүчин төгөлдөр үйлчилж байна. Манай улсад захиргааны үйл ажиллагаатай холбоотой харилцааг зохи­цуулсан Захиргааны хэрэг хянан шийдвэрлэх тухай хууль хэрэгжиж эхлээд 11, Захиргааны хэргийн шүүх үйл ажиллагаагаа явуулж эхлээд есөн жилийн хугацаа өнгөрөөд байна. Энэ хугацаанд төрийн байгууллага хуулиа дээдэлж ажиллах, иргэд, хуулийн этгээдийн эрх, хууль ёсны ашиг сонирхол зөрчигдвөл гаргасан шийдвэр хүчингүй болдог гэсэн уур амьсгалыг энэ хуулийн хэрэгжилт, Захиргааны хэргийн шүүхийн тусламжтайгаар бүрдүүлж чадсан. Гэвч өнөөдрийг хүртэл төрийн захиргааны үйл ажиллагааг зохицуулсан салбар хуулиудын хүрээнд нийтлэг асуудлуудыг нэгтгэн зохицуулсан суурь хуулиа бат­лан гаргаагүй байна. Тий­мээс дээрх асуудлыг зохи­цуулах үүднээс захир­гааны байгууллагын үйл ажил­лагаа­ны талаарх ерөнхий болон процессын нийтлэг харилцааг зохицуулсан хуулийн төс­лийг боловсруулан батлуулах зайлшгүй шаард­лагыг үндэс­лэн “Захиргааны ерөнхий бо­лон холбогдох бусад хуу­лийн төслүүд”-ийг боловс­руулсан.

Дээрх хуулийн төслийг өчигдөр УИХ-ын чуулганаар хэлэлцэж, хуралдаанд оролц­сон гишүүдийн 71.4 хувь нь дэмжсэн тул анхны хэлэлцүүлэгт бэлтгүүлэхээр Хууль зүйн болон Төрийн байгуулалтын байнгын хороонд шилжүүллээ.
Дээрх хуулийн төсөл нь 11 бүлэг, 108 зүйлтэй. Хуулийн төсөлд захиргааны байгууллагаас иргэдтэй харилцах суурь харилцааг нэгдсэн стандартад оруулахаар тусгажээ. Ингэснээр төр, иргэний хоорондын харил­цаанд суурь зохицуулалт бий болж иргэдийн эрх, хууль ёсны эрх ашиг сонирхол хамгаалагдах боломж бүрдэнэ гэж төсөл санаачлагч үзэж байгаа аж. Мөн захиргааны байгууллагаас иргэдтэй харилцах чиглэлээр гаргаж буй захиргааны шийдвэр нь захиргааны акт, гэрээ, захиргааны хэм хэмжээний акт гэсэн гурван төрөлтэй байхаар тусгажээ. Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулиар хориглогдсон этгээд нь захиргааны байгууллагыг төлөөлж захиргааны шийд­вэр гаргах ажиллагаанд орол­цохгүй байхаар зохицуулжээ.

Захиргааны байгуул­ла­гуудын хоорондын харил­цааг хуульчилж өгснөөр захиргааны байгууллага иргэ­дэд ил тод, хөнгөн шуурхай үйлчлэх үүрэг хүлээх юм байна. Түүнчлэн захиргааны шийдвэр гаргахдаа тухайн шийдвэрт эрх, хууль ёсны ашиг сонирхол нь хөндөгдөж болох оролцогчийг сонсох, тэдний хууль ёсны итгэлийг хамгаалах зарчмын хүрээнд тодорхой зохицуулалтыг тус­гажээ. Тухайлахад, орол­цогч нь захиргааны шийдвэр гаргах ажиллагаанд оролцоход хууль зүйн болон бусад мэргэжлийн туслалцаа авах эрхтэй байх аж. Мөн захиргааны шийдвэрийн хувийн хэрэг үүсгэж шийдвэр гаргахтай холбоотой бүхий л ажиллагааг захиргааны байгууллага бүрдүүлж, хадгалах, захир­гааны байгууллага, албан тушаалтнаас тодорхой шийдвэр гаргахдаа хуу­лиар зөвшөөрөгдсөн хувил­баруудаас аль нэгийг ашиглах боломжтой байх зэрэг шинэлэг зохицуулалтыг хуулийн төсөлд тусгасны зэрэгцээ захиргааны гэрээний талаарх эрх зүйн зохицуулалтыг анх удаа хуульчилсан өгсөн байна.