Ардчилсан намд жигүүр ургаж, тэр жигүүрийг нь УИХ-ын гишүүн асан А.Мурат удирдаж байгаа юм. Тэгвэл эл жигүүрээс өнөөдөр хэвлэлийнхэнд хандаж, “АН-д жигүүр байгуулагдсан гэдгийг албан ёсоор мэдэгдэж байна” гэсэн юм. Жигүүрийн хувьд нэрээ хараахан өгөөгүй байгаа бөгөөд нэр, дүрэм журмаа АН-ын нийт гишүүдээр хэлэлцүүлэн батлах аж.
Жигүүрийн зохицуулагч, А.Мурат хэлэхдээ, “Ардчилсан нам дүрэм журмынхаа дагуу ажиллахгүй байна. Энэ бол хууль бус үйлдэл. Үндэсний зөвлөлдөх хороо жил бүр гишүүдийнхээ дөрөвний нэгийг шинэчилж байх ёстой. Гэтэл намын дарга нар энэ хурлыг хойшлуулж, намын үйл ажиллагааг залуу боловсон хүчнээр цус сэлбэхгүй байна” гэсэн юм.
Мөн хэвлэлээр мушгин гуйвуулж байгаа шиг энэ жигүүрийнхэн намаас албан тушаал горилж байгаа үйлдэл биш харин ч шударга зүйлийн төлөө үйл ажиллагаагаа явуулна гэж байна. Тэрчлэн энэ жигүүрт АН-д доторхи бүх фракцийн төлөөлөл багтсан бол УИХ-ын гишүүн Ж.Батзандан, Р.Амаржаргал нар дэмжихээ илэрхийлжээ.